የአገር ውስጥ የታሸገ ውሃ አምራቾች ሲያመርቱበት የቆየውን ሰማያዊ የፕላስቲክ ጠርሙስ በመተው ውሃን በነጭ (ቀልም አልባ) ፕላስቲክ ጠርሙስ ማሸግ ጀመሩ፡፡ለረጅም አመታት አምራቾቹ ሰማያዊ ቀለም ባላቸው የፕላስቲክ ጠርሙሶች ሲያሽጉ የነበረ ቢሆንም የምግብና መጠጥ ኢንዱትሪ ምርምርና ልማት ማዕከል ባካሄደው ጥናት የፕላስቲክ ጠርሙስ ማቅለሚያ አካባቢ ላይ ተፅዕኖ የሚፈጥር በመሆኑ መልሶ ለግብአትነት ለመጠቀም አመቺ ባለመሆኑ እና አላስፈላጊ የውጭ ምንዛሬ ወጪን የሚያስከትል በመሆኑ የጠርሙስ ማቅለሚያ ማስተርባች ጥቅም ላይ እንዳይውል ተወስኗል፡፡
የኢትዮጵያ መጠጦች አምራች ኢንዱስትሪ ማኅበር ዋና ሥራ አስኪያጅ አቶ አሸናፊ መርድ ለኢትዮ የንግድና ኢንቨስትመንት መድረክ እንደተናገሩት ጥናቱ ለአንድ አመት ያህል ከተካሄደ በኋላ ፕላስቲክ ጠርሙስ ማቅለሚያ መነሳቱ እና በነጭ ጠርሙስ ውሃ ማሸጉ በአካባቢ ላይ ያለውን ተፅዕኖ የሚቀንስ እና የውጭ ምንዛሬን ለማዳን የሚረዳ በመሆኑ ውሳኔው ተላልፏል፡፡
በመሆኑም የታሸገ ውሃ አምራቾች ውሳኔውን ተቀብለው ከጥቅምት 1 ቀን 2015 ዓ.ም ጀምሮ በነጭ (ቀልም አልባ) ፕላስቲክ ጠርሙሶች ማምረት መጀመራቸውን አቶ አሸናፊ ተናግረዋል፡፡
ውሃ አምራቾች በተለያዩ ግብአቶች እጥረት እና ዋጋ መናር መቸገራቸውን መዘገባችን ይታወሳል፡፡
(ኢትዮ የንግድና ኢንቨስትመንት መድረክ)
